Volodymyr Zelenskyy ka veshur rrobat e tij të veçanta që nga fillimi i luftës ruso-ukrainase dhe pothuajse asnjëherë nuk devijon prej tyre edhe kur takohet me zyrtarë të vendeve të tjera. Bëhet fjalë për veshjet e markës ukrainase M-TAC, e cila prodhon pajisje për gjueti dhe turizëm, si dhe aksesorë të ndryshëm për armë, veshje dhe këpucë ushtarake dhe taktike. Komandanti Suprem i Forcave të Armatosura të Ukrainës Valery Zaluzhny, si dhe një numër i madh ushtarësh dhe civilësh në Ukrainë, veshin modele të kësaj marke.
Për shkak të luftës në Ukrainë, shumë ndërmarrje të vogla dhe të mesme u shkatërruan, por kjo nuk ndodh me markën M-TAC, shitjet e së cilës janë trefishuar nga shkurti 2022 deri më sot. Prodhimi në Kiev u zgjerua, fabrika në Lviv gjithashtu filloi të punojë dhe u punësuan 750 rrobaqepëse të tjera. Ekspertët financiarë parashikojnë se të ardhurat vjetore të markës duhet të jenë rreth 150 milionë euro. Besohet se këto të ardhura ndikohen edhe nga shitjet përveç kërkesave ushtarake, ku mund të shihet pikërisht ndikimi i Zelenskyy-t në rezultatet e përgjithshme të kësaj kompanie.
Marka u themelua në vitet nëntëdhjetë nga Alexander Karasev nga Kievi, një “dashnor i airsoft”, d.m.th simulimi ushtarak, për të cilin në atë kohë pajisjet nuk mund të gjendeshin në Ukrainë.
