Andrew Tate do ta kalojë natën e ndërrimit të viteve në një qeli të ngushtë prej vetëm 15 metër katrorë, të mbushur me buburreca. Kështu shkruajnë mediat ndërkombëtare, vetëm 24 orë pas arrestimit të 36-vjeçarit të njohur në rrjetet sociale, i cili akuzohet për prostitucion. Andrw u vu në pranga bashkë me të vëllanë, Tristan, me të cilin ndan qelinë në burgun e Bukureshtit që ka vetëm dy shtretër dhe një tualet në mes të dhomës. Një stil jete kjo, totalisht ndryshe nga çfarë është mësuar ish-kikboksieri.
Një raport mbi gjendjen e sistemit rumun të burgjeve nga Komiteti i Këshillit të Evropës për Parandalimin e Torturës dhe Trajtimit ose Ndëshkimit Çnjerëzor ose Poshtërues, i kryer në fillim të këtij viti, zbuloi të vërteta shqetësuese për kushtet e jetesës brenda burgjeve dhe trajtimin që vuajnë të burgosurit nga duart e rojet.
Qendra e rrënuar e paraburgimit në Bukuresht u ndërtua në vitet 1960 gjatë epokës komuniste të Rumanisë, por u rinovua në vitin 2015 për të përmirësuar kushtet. Ai strehon të akuzuarit për krimet më të urryera të kryera në Bukuresht dhe gjithashtu politikanë të profilit të lartë të akuzuar për korrupsion.
Sipas ligjit, të burgosurit në Rumani kanë të drejtën e një ore në ditë ‘zbavitjeje në natyrë’, akses në pajisjet e duhura ushtrimore dhe libra. Por raporti i Këshillit të Evropës zbuloi se shumica e të burgosurve qëndronin të mbyllur në qelitë e tyre për 23 orë në ditë në mjerim.
“Kushtet materiale në të gjitha burgjet e vizituara ishin përgjithësisht të këqija, me qeli të rrënuara, me mungesë të pajisjeve (hapësirë magazinimi, tavolina dhe karrige), dhe dyshekë dhe shtretër të konsumuar dhe të infektuar dhe me buburreca. U morën shumë ankesa për aksesin shumë të kufizuar në ujë të ngrohtë si dhe për ngrohjen e pamjaftueshme në qeli në dimër. Për më tepër, objektet sanitare ishin shpesh në gjendje të keqe riparimi dhe personat e ndaluar nuk kishin sasitë e duhura të detergjentit dhe produkteve higjienike. Për më tepër, një orë e rekreacionit në natyrë që u ofrohet të burgosurve zakonisht zhvillohet në një hapësirë të vogël me pak ose aspak dritë natyrale,” thuhet në raportin që përshkruan kushtet në të cilat ndodhet Tate aktualisht.
Të burgosurit në burgjet rumune shpesh i nënshtrohen trajtimit brutal, sipas një raporti tjetër të Këshillit të Evropës.
“U morën një numër i konsiderueshëm pretendimesh për keqtrajtim fizik të të burgosurve nga personeli i burgut, duke përfshirë abuzimin seksual nga stafi. U morën një numër i madh pretendimesh për keqtrajtim fizik (shumë prej të cilave u vërtetuan me prova mjekësore) nga oficerët e policisë. Akuzat përbëheshin kryesisht nga shuplaka, grushta, shkelma dhe goditje me shkopinj të shkaktuara nga oficerët e policisë kundër të dyshuarve për krime qoftë në momentin e arrestimit ose gjatë marrjes në pyetje në një stacion policie, me sa duket për qëllimin kryesor të detyrimit të rrëfimit.”- thuhet në një raport të vitit 2019.
Vëllezërit Tate u arrestuan dy ditë më parë. Gjykata në Bukuresht ka caktuar masën e sigurisë dhe vëllezërit i ka lënë në 30 ditë burg, ndërkohë që hetohen për prostitucion dhe pengmarrje. Tate i rekrutonte gratë në platformat e mediave sociale dhe i joshte ato duke u thënë se ishte dashuruar e do të martohej me to. Por, karta e ‘djalit të dashuruar’ skadonte kur vajzat mbërrinin në Bukuresht. Aty, ato përballeshin me realitetin, që ishte prostitucioni dhe të dy vëllezërit i detyronin të rejat të bënin video pornografike pa dëshirë. Nga këto video, 2 vëllezërit merrnin fitime marramendëse.
Dyshja u zbuluan pasi mes vajzave që kishin marr peng dhe mbanin 24 orë të vëzhguara në vilë, ishte dhe një amerikane. E reja arriti të kontaktonte me të dashurin e saj përmes një celulari që gjeti në shtëpi dhe ishte ai personi që dha alarmin në ambasadën amerikane. Ambasada vuri në lëvizje institucionet që bastisën vilën e vëllezërve Tate një natë më parë dhe i vunë të dy në pranga.
