Ministri i Brendshëm Juan Zapata ka dalë me një konferencë për shtyp për të njoftuar detaje lidhur me arrestimin e një prej trafikantëve më të mëdhenj të drogës në Ekuador, paraditen e sotme në Kolumbi. Mediat e huaja raportojnë se arrestimi i Wilmer Emiliano Sanchez Farfan i njohur ndyrshe me nofkën ‘Macja Farfan’ apo ‘Jerry’ është bërë në qytetin kufitar kolumbian, Pasto. Sanchez akuzohet se ka trafikuar drogë nga SHBA-ja drejt Evropës, ku është shpallur në kërkim ndërkombëtar dhe pritet të ekstradohet drejt Shteteve të Bashkuara ku edhe do të vuajë dënimin.
Ministri i Brendshëm, Juan Zapata deklaroi se i arrestuari ishte një nga trafikantët më të kërkuar të drogës në nivel ndërkombëtar dhe objektivi i vlerës dhe rëndësisë më të lartë për shtetin ekuadorian, një udhëheqës i kartelit të vetëquajtur ‘Nueva Generación Ecuador’.
Arrestimi u arrit pas 18 muajsh hetime, në një operacion të përbashkët mes policisë kolumbiane dhe ekuadoriane të quajtur “Ceres” për të ekzekutuar një urdhër arresti për qëllime ekstradimi të kërkuar nga Gjykata e Qarkut Jugor të Kalifornisë (Shtetet e Bashkuara).
Zapata shpjegoi se ekstradimi në Shtetet e Bashkuara do të kryhet nga Kolumbia, pasi ky vend ka këtë figurë ligjore, ndryshe nga Ekuadori, i cili ndalon ekstradimin e ekuadorianëve të kërkuar për çdo krim. Pikërisht, në referendumin e mbajtur të dielën e kaluar në Ekuador, një nga pyetjet e ngritura nga Qeveria për modifikimin e Kushtetutës për çështjet e sigurisë ishte lejimi i ekstradimit të qytetarëve që kërkohen për krim të organizuar.
Megjithatë, Ekzekutivi ekuadorian humbi konsultimin popullor duke fituar “Jo” në tetë pyetjet e parashtruara, përfshirë atë të ekstradimit, e cila ishte ajo me votën më të afërt, me 51.65% krahasuar me 48.35% të “Po”.
Ministri i Brendshëm deklaroi se “Gato Farfán” “koordinoi dërgimin e drogës në Shtetet e Bashkuara përmes modaliteteve të ndryshme përmes porteve kryesore të Ekuadorit dhe Meksikës, në bashkëpunim me kartelet Sinaloa dhe Jalisco Nueva Generación”.
Gjithashtu, ai pohoi se i arrestuari është përgjegjës për disa nga masakrat e burgjeve të ndodhura në Ekuador në vitet e fundit dhe që kanë lënë të vrarë më shumë se 450 të burgosur që nga viti 2020 dhe për disa vrasje në rrugë publike. Nga ana e tij, Zëvendës Komandanti i Përgjithshëm i Policisë Kombëtare të Ekuadorit, Manuel Iñíguez, vuri në dukje se “Gato Farfán” ishte arrestuar në fillim në vitin 2013 dhe kaloi kohë në burg derisa u lirua përsëri.
