Është shtyrë sërish seanca gjyqësore ndaj deputetit të Partisë Demokratike Ervin Salianji në Gjykatën e Apelit, shkak për këtë është bërë mungesa e avokatit të gazetarit Jetmir Olldashit. Në njoftimin e Gjykatës thuhet se seanca është shtyrë për në datën 19 dhjetor në orën 13:00. Mësohet se Gjykata ka zëvendësuar avokatin e gazetarit Jetmir Olldashi, Indrit Sefën pasi ky i fundit i kishte kërkuar Gjykatës të shtynte seancën pasi ndodhej jashtë vendit.
“Ne vijim te komunikimit, ju informojme se seanca e rradhes u caktua me date 19.12.2022 ora 13:00”, thuhet ne njoftimin e gjykates.
Ditën e sotme debateve në seancën plenare iu shtua dhe debati mes deputetit demokrat Ervin Salianji dhe kryeministrit Edi Rama pasi ky i fundit iu drejtua me fjalët se sot e priste një ditë e vështirë referuar gjyqit për çështje ‘babale’. Debati kaloi në fyerje personale mes kreut të qeverisë dhe Salianjit. Deputeti demokrat duke folur jashtë Kuvendit tha se gjuha e përdorur nga kryeministri ishte një fjalor prej rrugaçi dhe se e kërcënoi por sipas Salianjit ai nuk trembet nga kërcënimet e kreut të ekzekutivit.
Çfarë është dosja “Babale”?
Pranverën e 2018-ës, PD botoi 2 audioregjistrime, përmes së cilave supozonte se vëllai i ministrit të Brendshëm aso kohe, Fatmir Xhafaj, Agroni ishte i përfshirë në trafikimin e lëndëve narkotike. E tërë çështja u emërua “Babalja”, pasi dëshmitari X i Partisë Demokratike, i cili ishte i përfshirë në audioregjistrime, thirrej në to me pseudonimin “Babale”. Në përgjimet e publikuara por edhe në të tjera që Prokuroria dispononte, Alizoti komunikonte me asokohe shefin e Polisisë së Fierit, Albert Nushin (emri i del edhe tek vrasja e Pjerin Xhuvani) për shpërblime/pako që duhet të merrte, e gjithashtu flitej edhe për një “shef të madh”. Ekspertët e huaj vlerësuan se zëri në përgjime ishte i ngjashëm me atë të Geron Xhafës. Por ekspertiza nuk mund ta thoshte me siguri për shkak të cilësisë së audio-regjistrimit. Gjykata Penale dënoi me 1 vit burg deputetin e Partisë Demokratike, Ervin Salianji për akuzën e “kallëzimit të rremë”, në lidhje me dosjen “Babalja”. Bashkë me Salianjin u dënuan edhe personat e tjerë të përfshirë në këtë dosje. Fredi Alizoti, (i njohur si kunati i Babales), u dënua me 2 vite burg për kallëzim të rremë, Albert Veliu, i njohur ndryshe edhe si “Babalja” u dënua me 3 vite e 5 muaj burg, ndërsa gazetari Jetmir Olldashi u dënua me 5 muaj burg, që iu konvertua në 100 orë punë në komunitet.
