Gjykata Kushtetuese ka vendosur rrëzimin e kërkesës për shfuqizimin e Vendimin e Këshillit të Ministrave për ndërtimet pa leje. Shfuqizimin e VKM-së për ndërtimet e kërkuan 28 deputetë të opozitës, por sot Gjykata Kushtetuese vendosi rrëzimin e kërkesës në seancë plenare. Në njoftimin e vendosur sot në faqen zyrtare të GJK-së, vendosi rrëzimin e kërkesës duke u shprehur se ishte e papajtueshme me Kushtetutën.
NJOFTIMI I PLOTË:
Gjykata Kushtetuese e Republikës së Shqipërisë, pasi mori në shqyrtim në seancë plenare publike çështjen me nr. 6 (Nj) 2022 të Regjistrit Themeltar, me kërkues jo më pak se një e pesta e deputetëve (28 deputetë) të Kuvendit të Republikës së Shqipërisë, me objekt: “ Shfuqizimi i Vendimit të Këshillit të Ministrave nr. 589, datë 7.9.2022 “Për rregullat dhe procedurat për konfiskimin për interes publik të objekteve të ndërtuara pa leje për qëllim fitimi”, si i papajtueshëm me Kushtetutën e Republikës së Shqipërisë”, në mbështetje të neneve 131, pika 1, shkronja “c” dhe 134, pika 1, shkronja “c”, të Kushtetutës, si dhe neneve 72 dhe vijues të ligjit nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, të ndryshuar, njëzëri,
VENDOSI:
1. Rrëzimin e kërkesës.
Ky vendim është përfundimtar dhe hyn në fuqi ditën e botimit në Fletoren Zyrtare.
Vendimi përfundimtar do të shpallet i arsyetuar brenda afateve ligjore të parashikuara nga ligji nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, i ndryshuar dhe nga Rregullorja për procedurat gjyqësore të Gjykatës Kushtetuese.
Opozita e quajti shkelje të ligjit operacionin e qeverisë për konfiskimin e ndërtimeve, ndaj vendosi ta dërgojë në Kushtetuese me kërkesën për shfuqizimin e vendimit. Sipas demokratëve Rama ka marrë në mbrojtje oligarkët e ndërtimit të kullave pa leje në mes të Tiranës. PD kërkoi shfuqizimin si të papajtueshëm me Kushtetutën. Sipas padisë, ky vendim i qeverisë është marrë ne qëllim favorizimin e oligarkëve, të cilët kanë ndërtuar kate pa leje përmes të cilave kanë pastruar paratë e korrupsionit dhe krimit të organizuar në Tiranë.
