Ka një ton krenar por të kujdesshëm në mediat lokale ukrainase pas vendimit të Rusisë për të tërhequr trupat e saj nga qyteti i Kherson.
Oleksyi Arestovych, një bloger i njohur dhe këshilltar i Presidentit Zelensky tha përmes një postimi në Facebook se ishte fuqia e ushtrisë së Ukrainës që e detyroi Rusinë të tërhiqej.
“Ushtria ruse nuk u largua nga Kherson. Ajo u rrëzua nga Forcat e Mbrojtjes të Ukrainës”, shkroi ai.
Sidoqoftë, Arestovych beson se betejat ushtarake në bregun e djathtë të lumit Dnipro, ku ndodhet Kherson, do të vazhdojnë edhe për ca kohë.
Ukrainska Pravda, platforma më e njohur e lajmeve online në Ukrainë vuri në dyshim nëse tërheqja ruse është reale apo kemi të bëjmë me një hile apo kurth.
Në artikullin e faqes së parë, media ukrainase shkruante: “Nëse deklaratat e ministrit rus të Mbrojtjes janë të vërteta, mund të duhen të paktën disa ditë që rusët të kalojnë në bregun e majtë të lumit Dnipro”.
Edhe vetë zëvendës shefi i departamentit operacional të Forcave të Armatosura të Ukrainës tha se ushtria e Ukrainës nuk mund t’a konfirmonte tërheqjen e Rusisë nga qyteti.
“Në këtë kohë, ne nuk mund të mohojmë dhe as të konfirmojmë raportet për të ashtuquajturën tërheqje të trupave ruse nga Kherson”, tha Oleksiy Hromov, raporton Interfax.
