Eksportuesit shqiptarë janë ndërgjegjësuar për regjistrimin e markave të tyre si një hap përpara daljes në tregjet ndërkombëtare. Të paktën këtë konstaton Drejtoria e Përgjithshme e Pronësisë Industriale në raportin vjetor të vitit të shkuar.
“Gjatë vitit 2022, janë depozituar 10 kërkesa nga subjekte shqiptare që kanë kërkuar shtrirje ndërkombëtare të aplikimeve të tyre, nëpërmjet marrëveshjes së Madridit. Kjo tregon se këto subjekte eksportuese janë ndërgjegjësuar që hapi i parë përpara se të eksportojnë produktet e tyre është regjistrimi ndërkombëtar i aplikimit nëpërmjet marrëveshjes së Madridit ku shteti shqiptar është palë dhe ky regjistrim realizohet nëpërmjet DPP” thuhet në raport.
Në raport me vitin 2021 kemi një rënie të kërkesave totale të drejtuara në këtë institucion për regjistrim marke. Përgjatë vitit 2022, në Drejtorinë e Përgjithshme të Pronësisë Industriale janë paraqitur për regjistrim marke në total 1165 aplikime, në krahasim me 1404 aplikime në vitin 2021.
I njëjti dokument nënvizon se në totalin prej 1,165 të aplikimeve kombëtare për regjistrim marke, aplikimet nga subjektet shqiptare në vitin 2022arritën në 735.
“Në numrin total të aplikimeve në % për vitin 2022, aplikimet ndërkombëtare zënë 63%kurseaplikimet kombëtare zënë 37 % nga të cilat aplikime kombëtare nga aplikantë të huaj zënë rreth 13.6% dhe aplikimet me aplikant vendas zënë 23.3%. Në numrin total të aplikimeve në % për vitin 2021, aplikimet ndërkombëtare zënë 65%, aplikimet kombëtare nga aplikantë të huaj 13% dhe aplikimet vendase zënë 22%” thuhet në raportin e DPPI.
Sipas përmbledhjes gjatë vitit 2022, janë lëshuar në total 963 certifikata regjistrimi marke kombëtare. Kurse nga Marrëveshja e Madridit për vitin 2022, janë regjistruar 2016 aplikime ndërkombëtare. Edhe kërkesat për ripërtëritje të markave kanë qenë në rritje në vitin 2022 ku i atyre për të cilat është lëshuar certifikata e ripërtëritjes është afërsisht 9.8 % më shumë se në vitin 2021 dhe 8% në raport me vitin 2020.
Marrë nga Monitor.al