Ministri i Jashtëm i Kinës, Qin Gang nuk është parë në publik për tre javë, një mungesë jashtëzakonisht e gjatë gjatë një periudhe të ngjeshur të aktivitetit diplomatik në Pekin, duke ndezur spekulime intensive në një vend të njohur për paqartësitë e tij politike. Qin Gang, 57 vjeç, një diplomat karriere dhe ndihmës i besuar i liderit kinez Xi Jinping, u caktua ministër i Jashtëm në dhjetor, pas një periudhe të shkurtër si ambasador në Shtetet e Bashkuara. Si ministër i Jashtëm, Qin ka shprehur qortime të ashpra ndaj Uashingtonit pasi marrëdhëniet ranë në një nivel të ri si pasojë e një balone spiune kineze që u rrëzua mbi SHBA.
Ai ka luajtur gjithashtu një rol kyç në përpjekjet e mëvonshme nga të dyja palët për të stabilizuar lidhjet e vështira dhe për të rivendosur komunikimin, duke përfshirë takimin me Sekretarin e Shtetit të SHBA Antony Blinken gjatë vizitës së tij në Pekin në mes të qershorit. Por diplomati i profilit të lartë nuk është parë në publik që nga 25 qershori, pasi u takua me zyrtarë nga Sri Lanka, Vietnami dhe Rusia në Pekin.
Në daljen e tij të fundit publike, ai ishte i qeshur dhe u pa duke ecur krah për krah me zëvendësministrin e Jashtëm rus Andrey Rudenko, i cili fluturoi në Pekin për t’u takuar me zyrtarët kinezë pas një kryengritjeje jetëshkurtër nga grupi mercenar Wagner në Rusi.
“Duke pasur parasysh statusin dhe ndikimin e Kinës në botë, është vërtet shumë e çuditshme që ministri i saj i jashtëm nuk është shfaqur në publik për më shumë se 20 ditë,”- tha Deng Yuwen, një ish-redaktor i një gazete të Partisë Komuniste, i cili tani jeton në SHBA.
Kur u pyet për mungesën e zgjatur të Qin në një konferencë shtypi të hënën, një zëdhënëse e Ministrisë së Jashtme kineze tha se ajo “nuk kishte informacion për të dhënë”, duke shtuar se aktivitetet diplomatike të Kinës po kryhen si zakonisht. Mungesa e Qin u bë edhe më e dukshme nga stuhia e aktivitetit diplomatik në kryeqytetin kinez në javët e fundit, duke përfshirë vizitat e profilit të lartë nga zyrtarët e lartë amerikanë Janet Yellen dhe John Kerry.
Qin duhej të takohej me shefin e politikës së jashtme të Bashkimit Evropian, Josep Borrell, në fillim të këtij muaji në Pekin, por takimi u shty pasi Kina informoi BE-në se datat nuk ishin më të “lira”. Qin gjithashtu nuk u paraqit në një takim vjetor të ministrave të jashtëm të Shoqatës së Kombeve të Azisë Juglindore (ASEAN) në Indonezi javën e kaluar.
Zyrtarët e lartë kinezë janë zhdukur nga publiku në të kaluarën, vetëm për t’u zbuluar muaj më vonë nga se kanë qenë të ndaluar për hetime. Zhdukje të tilla të papritura janë bërë një tipar i zakonshëm në fushatën kundër korrupsionit të Xi./CNN