Ministria e Brendshme ruse ka deklaruar se gazetari investigativ Christo Grozev, është në listën e “të kërkuarve”.
Grozev, i cili është bullgar, është hetuesi kryesor i Rusisë në grupin e gazetarisë Bellingcat.
Informacionet e publikuara në faqen e internetit të ministrisë thanë se ai “kërkohej sipas një neni të Kodit Penal”, pa specifikuar arsen më detaje.
Sipas monitoruesit të pavarur të të Drejtave të Njeriut OVD-Info, kundër Grozevit është hapur një çështje penale për shpërndarjen e “lajmeve të rreme” për ushtrinë ruse.
Qeveria ruse miratoi një ligj që kriminalizon shpërndarjen e informacionit “qëllimisht të rremë” për forcat e armatosura ruse që kur filloi pushtimin ndaj Ukrainës.
Grozev ka raportuar lajme mbi përfshirjen e Rusisë në një sërë krimesh ndërkombëtare të profilit të lartë, duke përfshirë rrëzimin e fluturimit 17 të Malaysia Airlines në vitin 2014 në Ukrainën lindore dhe helmimin e Sergei dhe Yulia Skripal në Mbretërinë e Bashkuar në vitin 2018. Moska ka mohuar në mënyrë të përsëritur çdo përgjegjësi për çdo sulm.
Që nga fillimi i luftës ndaj Ukrainës, Grozev ka përdorur mjete digjitale me burim të hapur për të dokumentuar krimet e luftës dhe mizoritë e tjera të kryera gjatë konfliktit.
Nëpërmjet një postimi në Twitter, Grozev ka shkruar se nuk e di pse emri i tij është në listën ruse si i kërkuar.
“Nuk e kam idenë se për çfarë arsye Kremlini më ka futur në ‘listën e tij të kërkuar’, kështu që nuk mund të jap asnjë koment në këtë moment. Në një farë mënyre nuk ka rëndësi. Për vite me radhë ata e kanë bërë të qartë se janë të frikësuar nga puna jonë dhe nuk do të ndaleshin para asgjëje për ta larguar atë”, tha ai në një postim në Twitter të hënën.
Sipas OVD-Info, të paktën 370 persona janë përballur me ndjekje penale për deklarata dhe fjalime kundër luftës. Dhjetëra prej tyre janë larguar nga Rusia dhe janë vendosur në listën e të kërkuarve.
