Ilirjan Kazuni po hetohet në mungesë sipas një mase të shpallur nga gjykata e Tiranës e cila ka bindjen se i dyshuari që e kishte të dashur denoncuesen e ktheu në përdoruese. Por më pas ai krijoi lidhje intime edhe me motrën e saj, me të cilën nisi fshehtas bashkëjetesën duke i ofruar edhe asaj kokainë. Prokuroria thotë në fashikull se rasti i shtëpisë së kokainës u zbulua nga një incident xhelozie midis dy motrave. Më e madhja e bindur për tradhtinë kontrolloi befasisht banesën dhe zbuloi se kishte pasur të drejtë për tradhtinë e po ashtu u ballafaqua dhe me një të vërtetë tjetër të hidhur, edhe motra e vogël ishte kthyer në përdoruese.
Prokurorja e çështjes, Rovena Zoto në shkresat që disponon TCH shpjegon se vajza me emrin Erjona nisi bashkëjetesën me shpërndarësin e po ashtu edhe kokainën.
“I dashuri ma ka siguruar disa herë kokainën dhe nuk e kam kallëzuar pasi kisha marrëdhënie me të,”- shprehet e reja në polici.
Një muaj para ngjarjes e reja u nda prej 40-vjeçarit dhe kishte dyshime që ai kishte nisur raport me motrën e saj të vogël. Këtë të fundit e gjeti në një apartament te marrë me qira nga çifti.
“Kur e pashë, motra ishte në gjendje të droguar,”- thotë në polici denoncuesja.
Por, edhe pse e zhgënjyer prej të dyve, ajo këmbëngul në dëshmi se shpërndarësi e mbante forcërisht në banesë. megjithatë ky version nuk u vërtetua nga policia që mori në pyetje edhe motrën tjetër.
Gjatë kontrolleve në këtë banesë që gjendet në rrugën ‘Gjon Muzaka’ policia thotë se gjeti lëndë narkotike kanabis e kokainë, peshore elektronike, si dhe sendet që përdoren për ambalazhimin e dozave i përkasin Kazunit dhe për këtë arsye ai u akuzua vetëm për shpërndarje e jo për pengmarrje.
Përpos kqyrjes së vendngjarjes prokuroria ka administruar rrëfimet e të dyja motrave, që të dyja tanimë përdoruese. Përdorimi i drogës pranohet tanimë që është një problem në kryeqytet. Zyrtarisht policia deklaron për TCH se çdo muaj në sallën operative administrohen 70 deri në 80 telefonata nga qytetarë rastësore që konstatojnë përdorim droge në ambiente publike apo pranë shtëpive të tyre.
Marrë nga TOPCHANNEL