Nga e hëna, datë 3 korrik, do të mbyllen sportelet e Kadastrës. Kryeministri Rama tha se nga kjo datë do të mbarojë “regjimi 30-vjeçar i letrave, vulave, shefave”.
Në prezantimin e kësaj reforme, Rama sqaroi se gjithçka do të jetë online me nënshkrim e me vulë elektronike. “Praktika, të paguash për të marrë shërbimin apo të shërbesh duke u paguar, do të arkivohet si pjesë e historisë së dhimbshme të së shkuarës”, njoftoi kryeministri Rama.
Nga ana tjetër, fjalën e mori edhe Drejtoresha e Kadastrës, Dallëndyshe Bici, e cila tregoi se si do të funksionojë arkiva dixhitale e ASHK-së. Ajo theksoi se synimi është që të kalohet nga dixhitalizimi 2D në atë 3D.
“Arkiva dixhitale brenda pak muajsh do të ruhet me sistemin ‘block chain’ dhe funksionimi do të jetë vetëm nëpërmjet e-Albania. Në 3 javët e para, kemi bërë një ndërmarrje, me marrjen e vulave të njoma nga drejtoritë vendore. Brenda institucionit, dy tavolina përballë njëri-tjetrit nxirrnin dokumente që kundërshtonin me vulë zyrtare njëri-tjetrin.
Qytetarët kishin të drejtë të na mallkonin. Si mund të eliminonim një sistem agallarësh që funksionon si vilajete, zyrtarë që pronat e shqiptarëve i shikonin si të babës. Përzgjedhja rastësore nëpërmjet një programi që nuk njeh qytetar, nuk njeh qytet, nuk njeh zyrtar. Synimi është të kalojmë nga dixhitalizmi 2D në atë 3D”, u shpreh Bici.
Të pranishëm në prezantimin e reformës ishin kryeministri Edi Rama, ministra, deputetë socialistë dhe kryebashkiakë.