Një ngjarje tragjike ka ndodhur pasditen e sotme në Fushë-Arrëz. Mësohet se në fshatin Apripe Guri, një 50-vjeçar ka humbur jetën pas shpërthimit të një lënde plasëse teksa po peshkonte në liqenin e Fierzës. 50-vjeçari, i identifikuar me inicialet P.J. deri më tani, ka qenë duke peshkuar në liqenin e Fierzës kur lënda plasëse ka shpërthyer.
Njoftimi i Policisë:
Fushë Arrëz, Pukë/Informacion paraprak
Më datë 26.03.2023, rreth orës 18:20, në fshatin Apripe Guri, Fushë Arrëz, shtetasi P. J., 50 vjeç, banues në fshatin Apripe Guri, Fushë Arrëz, dyshohet se ka humbur jetën nga shpërthimi i lëndës plasëse me të cilën ai po peshkonte në liqenin e Fierzës. Grupi hetimor po kryen veprimet për sqarimin e rrethanave të kësaj ngjarjeje.
