Rreth një muaj më parë, shqiptarët në Britani zhvilluan një protestë jashtë Parlamentit në Londër, duke vendosur flamurin kuqezi në statujën e Winston Churchill.
Daily Mail ka publikuar një shkrim, sipas së cilës, organizatorët e kësaj proteste ishin dy shqiptarë të dënuar më parë për trafikimin e qenieve njerëzore.
Sipas medias britanike, organizatorët e protestës ishin vëllezërit, Taulant dhe Enkeleid Omi. Në tubim ishin rreth 1500 qytetarë shqiptarë.
Gjithashtu, ata organizuan edhe festën e shqiptarëve me makina luksoze në Londër, për ditën e Pavarësisë.
Një muaj më parë, Enkeleid Omi tha për gazetarët se: Ne mendojmë se është në të mirën e komunitetit tonë të tregojmë se nuk jemi ata që na cilësojnë autoritetet. Ne nuk jemi kriminel, ne nuk jemi pushtues.
Por, vazhdon shkrimi, vëllezërit Omi u shpallën fajtor në vitin 2015 pasi u kapën duke trafikuar një grua shqiptare në Mbretërinë e Bashkuar. Edhe vetë ata kanë mbërritur ilegalisht në Britani.
Ndërkohë, Taulant Omi në momentin e mbërritjes në Britani, pretendoi se ishte shtetas kosovar dhe kërkoi azil. Aplikimi i tij u refuzua, por ai e fitoi çështjen në apel në vitin 2006. Pas disa vitesh, ai arriti të marrë nënshtetësinë britanike.
