Emiljan Burbës, 54 vjeç, banues në Tiranë dhe i dënuar për trafik droge në Itali i janë sekuestruar 3 milionë euro pasur. Në njoftimin zyrtar bëhet me dije se të njohurit si miku i Aldo Bares (Alfred Shkurti) i janë vënë nën sekuestro dy resorte në Sarandë, 1 automjet (kamion) dhe 1 rimorkio. Vendimi është marrë pas dy vitesh hetime, ndërohë që në njoftim bëhet me dije se po vijon puna për të zbuluar asete të tjera që Burba ose familjarët e tij mund t’i kenë regjistruar në emër të personave të tjerë.
Njoftim i policisë Tiranë:
Vijon puna për gjurmimin, identifikimin dhe sekuestrimin e pasurive që rrjedhin nga aktiviteti kriminal. Finalizohet pas një hetimi dyvjeçar, operacioni policor i koduar “Resort 2012”. Sekuestrohen pasuri që arrijnë vlerën 3 milionë euro, të cilat dyshohet se rrjedhin nga veprimtaria kriminale e një shtetasi të dënuar në Itali, me 21 vjet burgim, për trafik droge. Në kuadër të procedimit penal për evidentimin dhe sekuestrimin e pasurive që rrjedhin nga veprimtaria kriminale, referuar nga Sektori për Hetimin e Krimit Ekonomik dhe Financiar në DVP Tiranë, nën drejtimin e Prokurorisë pranë Gjykatës së Shkallës së Parë Tiranë, pas një hetimi dyvjeçar të ndjekur me metoda proaktive, u zhvillua operacioni policor i koduar “Resort 2012”. Në zbatim të këtij procedimi, u bë ekzekutimi i vendimit të Gjykatës së Shkallës së Parë, për vendosjen e sekuestros preventive ndaj pasurive të paluajtshme në ngarkim të shtetasit Emiljan Burba, 54 vjeç, banues në Tiranë. Ky shtetas është ndaluar në Tiranë, në vitin 2014, dhe është ekstraduar në Itali, pasi Gjykata e Apelit në Torino, Itali, e ka dënuar me 21 vjet burgim, për trafik droge. Në zbatim të vendimit të Gjykatës u bë sekuestrimi i pasurive të paluajtshme, vlera e të cilave shkon rreth 3 milionë euro, konkretisht: •2 ndërtesa (resorte), në Sarandë, 1 automjet (kamion) dhe 1 rimorkio. Nën drejtimin e Prokurorisë po vijon puna për të zbuluar asete të tjera që ky shtetas ose familjarët e tij mund t’i kenë regjistruar në emër të personave të tjerë.
Emilian Burba u arrestua në Shqipëri në vitin 2014 dhe u ekstradua drejt Italisë, pasi Gjykata e Torinos e kishte dënuar me 21 vite burg për trafik droge. Procesi ka nisur që në vitin 2006, kur prokurorët Stefano Castellani dhe Dionigi Tibone mbyllën hetimet dhe kopsitën dosjen, për narkotrafikun nga Turqia, Shqipëria e Italia. Burba listohej mes organizuesve të trafikut të lëndëve narkotike nën drejtimin e Alfred Shkurtit, njohur si Aldo Bare dhe si “profesori”.
