Vihet në pranga Arlind Lagji, ish-drejtori i doganës së Fierit, i cili shkaktoi një ditë më parë dy aksidente. Policia bën të ditur se 46-vjeçari, teksa po drejtonte mjetin në gjendje të dehur në rrugën “Gjergj Kastrioti”, aksidentoi një grua rreth të 66-ave e më pas u largua nga vendi i aksidentit dhe ka vijuar lëvizjen. Po në atë aks rrugor, ai është përplasur me automjetin tip “Peugeot” me drejtues një 63-vjeçar. Lagji do të hetohet për veprat penale “Drejtimi i automjeteve në mënyrë të parregullt”, “Shkelja e rregullave të qarkullimit rrugor“ dhe “Largimi nga vendi i aksidentit”.
Dy personat e aksidentuar ndodhen në spital, jashtë rrezikut për jetën.
NJOFTIMI I POLICISË:
Vlorë-Aksidentoi një këmbësore, me automjetin që e drejtonte në gjendje të dehur, u largua nga vendi i ngjarjes dhe më pas përplasi një automjet, vihet në pranga 46-vjeçari. Specialistët e Qarkullimit Rrugor të DVP Vlorë arrestuan në flagrancë shtetasin A. L., 46 vjeç, banues në Vlorë, për veprat penale “Drejtimi i automjeteve në mënyrë të parregullt”, “Shkelja e rregullave të qarkullimit rrugor“ dhe “Largimi nga vendi i aksidentit”.
Ky shtetas, ditën e djeshme, duke drejtuar automjetin tip “Volksëagen”, në gjendje të dehur, në rrugën “Gjergj Kastrioti”, ka aksidentuar shtetasen I. S., 66 vjeçe, banuese në Vlorë, është larguar nga vendi i aksidentit dhe ka vijuar lëvizjen, në këtë aks rrugor, ku më pas ka përplasur automjetin tip “Peugeot” me drejtues shtetasin B. C., 63 vjeç, banues në Vlorë.Shtetasja I. S. dhe shtetasi B. C. ndodhen në spital, jashtë rrezikut për jetën. Materialet iu referuan Prokurorisë, për veprime të mëtesjshme.
